الله يكون فى عون اللبان

كنت راكبة انهارده الاتوبيس - اصل انا بنت مواطن على اده لا عنده عربية ولا يحزنون المهم - ولقيت بنت طلعت ووفقت ادامى ومشغله مكن 4000 حصان فى بوقها ( فمها ) وشغاله ندغ فى اللبانة , انا كنت حاسة ان اللبانة بتقولها ارحمينى ارمينى انا تعبت , لكن بوقها متعبش , ده مكن المصانع بيتعب ويهنج لكن دى ماشاء الله اللهم لا حسد على بوقها شغــال 2400 ساعـــة فى الــــ24 ساعة , وانا طبعا ً اعده مـتـنحه لــها مستنيه اشوفها تريح بوقها لكن ابدا شكلها حالفة ميت يمين انها متريحش خالص ولا حتى ثانية , حتى بتكلم الناس وهى بتندغ اللبانة كلمة وتكمل ندغ , بجد انا اشمأزيت من المنظر ده , انا مبقولش ان ندغ اللبان حرام ولا وحش لكن ليه برضو اسلوب فى ندغه , بحيث ان الناس متشوفنيش أوتلاحظنى وانا بندغ يعنى , وانا اصلا مش بحبذ ان البنت تمشى تندغ لبان فى الشارع وتتشدق باللبانة.

اما بالنسبة بقى للشباب الصاعد ابناء المستقبل فبرضو وللاسف بيندغوا اللبان وان كان مش زى البنت اللى انا شوفتها دى بس اسمه بيندغ لبان وعامل زى البنت كده بيبقى شكله مش حلو خالص وانا عن نفسى مش بحترم الشاب اللى بيندغ لبان بس هو ممكن لو عاوز يندغ لبان يندغه كده بشكل مش واضح وعلى خفيف عشان محدش يزعل بس .

انا بجد بوقى وجعنى من البنت اللى انا شوفتها فى الاتوبيس دى كان شكلها صعب اوى وهى بتندغ اللبانه بجد ربنا يدى الصحة للبان اللى بيفتروا عليه الناس ومش بيحسوا بالامه وحسبى الله ونعم الوكيل فى كل ظااااااااااااااااالم ( اللبانة اللغلبانه ) احب اعرف بقى رايكم فى اللبان وطريقة ندغه وايه رايكم فى الناس وهى بتندغ اللبان ؟ مستنياكم