البجاحة بقيت شجاعة

وانا اشاهد برنامج مع نشوة على قناة دبى حيث انها من البرامج التى احب متابعتها لانها تقدم الجديد واسلوب المذيعة جيدا وفى كل مرة انجذب اكثر للبرنامج وكانت هذه المرة من بينهم حيث تحدثت عن طلب الفتاه الزواج من الشاب فهى التى تقوم بخطبته وليس هو كما هو متعارف عليه وما صدمنى انها استضافت فتاه بالفعل فعلت هذا الموقف حيث اعجبها شخص وسيم وشعره سايح على خدوده - وجميل لدرجة انها انبهرت بجماله فذهبت اليه وعرفته بنفسها انها سماح وقالت انا عجبنى اوى شعرك وشكلك والله البنت قالت هذا الكلام فى البرنامج بكل بجاحة ثم طلبت منه رقم تليفونه لكى تكلمه وبالفعل كلمته لاول مرة وقالت له انا سماح قال لها سماح مين ؟ ومن هنا عرفت انها ليست فى باله وانه من الشباب الفاضى ودماغه مفيهاش حاجة كما ترى هى

والذى صدمنى اكثر واكثر ان الاستاذة نشوة مقدمة البرنامج استضافت شخصية اسلاميه وهو الاستاذ / احمد عبد الرحيم السايح استاذ العقيدة والفلسفة بجامعة الازهر والذى ايد وشجع هذه الفتاه على كلامها واصفا اياها بالشجاعة على ماقالته وما فعلته ايضا فهى استطاعت ان تكسر سور الخوف والخجل الذى اعتادت عليه البنت وتعجبت جدا من هذا الكلام فهو يشجع الفتيات على ان يذهبن للشباب ويطلبن يده للزواج كيف ؟ هل يعقل هذا ؟هل وصلنا لهذه الدرجة من الاستهتار والفساد ؟ هل بهذه الطريقة يمكن ان تتحرر المرأه ؟ فقد قالت سماح ان " بدل ما نجيب حد من بره يحررنا احنا نبدأ بانفسنا " هذا كلام جميل ولكن التحرر هل يكون فى التحرر من الاخلاق والاداب التى علمنا القران اياها ؟ والادهى ان كلما امنت الفتاه بهذا الكلام جاءت بما يثبت كلامها من عهد الرسول صلى الله عليه وسلم وهو ان السيدة خديجة هى التى طلبت الزواج من الرسول صلى الله عليه وسلم ولكن الحقيقة التى شوهناها هى ان السيدة خديجة رضى الله عنها اعجبت بسيدنا محمد واسرت بذلك لصديقة مقربه لها فبدأت ترغب الرسول صلى الله عليه وسلم فى السيدة خديجة ولم تقل له ان السيدة خديجة تحبك او معجبه بيك فهى لا تريد ان تقلل من شأنها وانما تجعلها تأتى من ناحيته انه هو الذى طلبها للزواج وليست هى وهو ما قاله الاستاذ احمد ومع ذلك يناقض نفسه حين يشجع البنت على ان تتقدم لخطبة الولد الذى يعجبها

البنت : ازيك عامل ايه ؟

الولد : الحمدلله انتى ايه اخبارك ؟ ها هتيجى امتى البيت بقى ؟

البنت : هاجيلكم انهارده انا وبابا وماما عشان يشوفوك

الولد: بجد انا مش مصدق ودانى اخيرا هتيجى

البنت : ايوة يابنى فيه ايه ؟ وكمان جايز نتفق عالمهر والذى منه

ذهبوا الى بيت العريس

البنت : ازيك يا اونكل ؟

والد العريس : الحمدلله ازيك يابنتى ؟

البنت : والله انا مش عارفة ابدأ منين

والد العروسة : احنا جايين انهارده ........ وتقاطعه البنت

البنت : استنى يا بابا انا هتكلم الله ..... انا جايه يا اونكل اطلب ايد ابنك ليا

والد العريس : ياسلام ده يوم المنى والهنا يوم مانتى اللى تيجى تاخدى ابنى ويقوم يزغرد ( ماخلاص الدنيا اتقلب حالها

البنت : بالنسبة لطلباتكم بقى عشان نتفق مع بعض

وشوية ويدخل الولد بالشربات ورجليه ترتجف وتقوم البنت تاخد منه الصينية وتبص فى عنيه اوى وهو يحط وشه فى الارض من الكسوف ياخواااااااااااااااتى

والد العريس : ماتتفضلى يابنتى تقعدى بالنسبة بقى لطلباتنا فهى مش كتير يا دوبك حظاظتين فى الايد وخاتم فى الصباع الصغير وسلسلة فى الرقبة اما الشقة فانتوا عليكوا الشقة كلها ماعدا المطبخ وحجرة النوم طبعا ديه علينا احنا

البنت : اتفقنا نقرا الفاتحه بقى ونتوكل على الله

ثم تقوم ام العريس تزغرد ويجوا الجيران يسألوا فى ايه يا ختى؟ تقولهم الواد اتقرى فتحته انهارده عقبال ولادكم اهيه العروسة اللى جوه ديه الجيران :وهى اللى جات يا ختى ؟ ايوة ماحنا فى عصر السرعة انتوا مش عايشين ولا ايه ؟ الجيران : اللهم احفظنا عشنا وشوفنا البنت هى اللى تيجى تتقدم للولد اللى يعيش يا ما يشوف

هو ده اللى احنا فى انتظاره الايام القادمة.................. انتوا ايه رأيكم ؟