أجمل هديتين

أنا فعلا سعيدة جدا لانى حصلت على هديتين فى يوم واحد من شخصيه واحده

وهى الاخت العزيزة والحبيبة آيه صاحبة مدونات البيت بيتك و حياتى فى سعادة الاخرين

و مذكرات شابه

وقد اهدتنى هدية جميييييييلة جدا فى مدونة البيت بيتك وكان طعمها حلو اوىىىىىى

لم اكن اتوقع ان يحتفل بى أحد بهذا الشكل ولم اتوقع ان تكون هذه هديتها بجد انا سعيدة جدا

اما الهدية التانية فكانت التاج اللى هجاوب عليه الآن

تابعوووووونى

اسم مدونتك

فتاه من القلب

لماذا اخترته؟..وماهى نيتك من وراء اختياره

انا اخترت الاسم ده لانى حبيت اتكلم من قلبى واقول كل الى فى نفسى

خاصة فى المواضيع اللى تخص بلدى واهلى وكل الناس

هل فكرت فى اغلاق مدونتك؟...وما السبب

فكرت .. لانى حسيت انى زهقت وانى بجلس كتير على الكمبيوتر

من غير ماستفيد من وقتى بالشكل السليم

صورتك فى المدونه...ورمزيتها

صورتى هى طفلة صغيرة ترتدى حجاب وهى بتعبر عن البراءة وجمال الروح

والطفولة الجميلة وبحس انها بتفكرنى بنفسى لانى زمان وانا صغيرة كنت احب انى البس

خمار الصلاه وكان نفسى اتصور بيه لكن للاسف كبرت من غير ماتصور بيه وانا بصلى

فعجبتنى الصورة دى وشدتنى وحطيتها لتعبر عما بداخلى

لم دخلت عالم التدوين من الأساس

انا اولا عرفته من زميل كنت بلاقيه يكتب مواضيع كتير وحاجات حلوة وباسلوب جميل

وكمان فكرت انى خريجة اعلام ولازم اكتب واعبر واعود نفسى على الكتابة ففكرت ان يكون ليا مدونة خاصة اعبر فيها

عن راى واعرف راى غيرى واتناقش مع قراء المدونة

جمله قيلت لك فى وصف مدونتك

هى كلمة جميلة وتكفينى هذه الكلمة والله لتغمرنى السعادة

التعليقات بالنبسة لك...ما أهميتها

مهمه جدا لانها بتحسسنى بمدى اهمية الموضوع اللى كتبته

وبتعرفنى براى الغير وان كان راى صح وتفكيرى صح ولا لا

أحلى بوست كتبته...ضع اللينك ثم اذكر لماذا؟

هو دعوة عامة .... لحفلة النجاح

http://aliaa-aliaa.blogspot.com/2007/07/blog-post_29.html

أفضل مدونه قرأتها

والله فى اكثر من مدونة وهكتبهم كلهم

فى مدونة بحبها كتيير اوى لانها بتتكلم صح وهى مذكرات شابه

وبرضو حياتى فى سعادة الاخرين لان فيها قصص روعة وليها معنى كبير

مدونة تانية وهى اسكندرانى اوى لانى بحس فيها انى فى اسكندرية

مدونة تالتة وهى جدو لان بشوف فيها خبرات كبيرة وجد عسل بجد كنت بدور عليه

مدونة خواطر علياء لأنها عجبتنى جدا وجميلة فعلا وبتبين مشاعر صاحبتها الرقيقة

حد قل أدبه فى التعليق..ايه رد فعلك؟؟

لا محصلش قبل كده وان كانت مش قلة ادب لكن الاسلوب فى الكلام بس مش حلو

وكان رد فعلى انى رديت عليه بادب لكن ممسحتش رده لان رده مكنش وحش لدرجة انى امسحه

أسوأ مدونة

مش هقول اسمها

أسوأ بوست؟...أسوأ مدون

هو رضاعة الحلاليف وأسوأ مدون برضو مش هقول

انت سعيد؟

الحمدلله راضيه بما قسمه الله لى

لو اجتمعت انت وحسنى مبارك فى غرفه واحده

هقوله ليه بتقتل احلام الشباب؟ افتح المصانع اللى اتقفلت بتاعت الغزل وخلينا احنا اللى نعمل

حاجتنا بادينا ونبقى زى الصين ... ليه تخلينا زى الشحاذين بنأخد البواقى من أمريكا وغيرها

ونضيع شبابنا وبعدين نقول مشكلنا كترت ... نفسى تفكر صح

لو معاك مليون ونص مليون هاتعمل بيهم ايه

لو ملكى انا مش ملك حد تانى هشوف الناس اللى اعرفهم ومحتاجين واساعدهم حتى لو هياخدوا

المليون ويسيبولى نص مش مهم والباقى اشوف اهلى عاوزين ايه بس

بتحب البنات

جداااااااا اكتر من الصبيان

مسلم

الحمدلله

من أكتر شخصيه ماتقدرش تستغنى عنها وليه؟؟

عائلتى كلها مقدرش استغنى عنها لان كل واحد فيهم ليه دور فى حياتى

ايه أكتر موقف محرج اتعرضت ليه فى حياتك؟..واتصرفت ازاى؟؟

اللى فكراه انى كنت راكبه اتوبيس من الاخضر وكان زحمة جدا وانا واقفه بجوار السواق

والرجالة اعدين وعمالين يبصولى ولا واحد منهم اتحرك عشان اعد وبعدين السواق ماشى بسرعة

جنوووونية وفجأة كان هيخبط فى الكوبرى فوق فجأة روحت انا بقى بشطرتى لانى مش عارفة اقف روحت واقعة

على عجلة القيادة ايوة ادام السواق معرفش ازاى ... وطبعا تصرفى ان وشى احمر وبرضو محدش من الرجالة فام

!!!! وعجبى

ايه الأمنيه اللى بتدعى ربنا دايما انه يحققهالك

انى اقدر اساعد الناس واللى يحتاجنى ويطلب منى مساعدتى اساعده

وانى اتزوج انسان صالح يدخلنى الجنة وادخله الجنة

امررة لمين لمين لمين

لكلمات

حكاية

و اسكندرانى فى الغربة بالرغم انه مجابليش هديتى بس يلا

خلينى انا الاحسن

وخواطر علياء

وطبعا جاءت لى هدايا كثيييييرة من ناس اخرى غير آيه وهو اسكندرانى اوى

وارسلها لى على الميل وأيضا ناس اخرى بعتتلى صناديق بيبسى

وفى ناس بقى طلبت منى انى ابعتلها انا صناديق البيبسى

يلا بالهنا والشفا