تاجتوجه جديد

بعد غياب طويييييييييييييييل عن المدونة وعن مدونات الاصدقاء المدونين رجعت تانى الحمدلله ولقيت الاخت ايويه بعتالى تاج كان لازم ارد عليه لانها بعتاه بقالها كتيييييير وارجوا انها تسامحنى وسعيدة انى اول مارجعت لقيت تاج ارد عليه واشوف ردودكم من تااااااااااااانى اللى وحشتنى

لو قالولك اختار عصر من عصور مصرعلشان تعيش فيه تختار اى ‏عصر و فى عهد اى حاكم .. واشمعنى ؟

انا بجد اختار عهد الرسول صلى الله عليه وسلم وعهد الصحابة لانه فعلا كان اجمل عهد وكان الدين واضح فيه وجلى مش زى دلوقتى بقى مش باين ان كنت فعلا مسلم ولا ايه بالظبط او اسمك مسلم لكن انت مش كده ولا بتعمل بالدين اللى بتحمل اسمه

اول ‏اولويه فى حياتك عيلتك ولا شغلك ولا اصحابك؟

عائلتى طبعا هى الاهم ثم شغلى ثم اصحابى

ايه اكتر ‏حاجه بتحبها فى رمضان؟

ذكر الله وقراءة القرآن اجمل حاجة عشان رمضان لما بيجى علينا الواحد بتبقى همته عاليه اوى لسباق الناس الى الله وربنا يثبتنا

اوصف ليا ‏اجمل فطار ممكن تفطره

اجمل فطار بالنسبة لى هو اللى بكون فيه مع اسرتى كلها كاملة يعنى والديا واخواتى حتى وان كان فطار عادى بس بيبقى ليه طعم تانى خاصة يوم الجمعة

لو انت ‏حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم ‏عادل؟

انا كنت فعلا حاكم على جروب من ست اشخاص ايام الجامعة اثناء عمل المشروع وكنت بحاول اراعى ربنا فيهم واعطى كل واحد حقه .... لكن لما لقيت بعضهم بدأ يستغل ده اضطريت انى اشد شوية عليهم عشان المركب تمشى وكنت شايله المسؤلية كامله بفضل ربنا الحمدلله .... واعرف انى عادله من خلال تفاعل الافراد دول معايا وتعاملهم ومجهودهم معايا وده اللى حصل برضو اثناء الجامعة عشان انا كنت كويسة معاهم وبراعى ربنا فيهم كانوا هم برضو بيعملوا شغلهم على اكمل وجه لانى انا كمان بأدى دورى على اكمل وجه وبطلب منهم اللى فى وسعهم مش بستغل سلطتى يعنى الحمدلله ... وده كان اجمل شعور بالنسبة لى لكن كان فيه بعضهم بيتواكل لانه شايفنى بشتغل فتواكل عليا وكسلوا هم بس كان لازم يفوقوا بإنى اعرفهم انهم المسؤلين عن انجاز الشغل اللى فى ايديهم مش انا وبالتالى هم اللى هيتحاسبوا وده اللى حركهم الحمدلله وفى النهاية فاز المشروع بالمركز التانى والحمدلله

اللى بيبوظ الحكام .. نفسهم؟ ولا الشعب؟ ‏ولا الحاشيه المقربه؟

النفس اولا لانها امارة بالسوء ثم الحاشية المقربة لان الحاكم لو كان هو نفسه ملتزم ويراعى ربنا وعنده ضمير كان هيعرف الصح من الغلط

مين ‏أكتر اعلامي مصري بتحترمه؟

طارق علام

قريت ديوان عمر مصطفى صاحب بلوج تجربه " اسباب وجيهه للفرح" ‏عن دار ملامح و لا لسه ؟؟

لا والله مقرأتش وعذرا يعنى معرفهوش

لو ‏ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ‏ايه؟

مصممة جرافيك ومواقع

ايه تانى بلد تتمنى تعيش فيها بعد ‏مصر؟

كتيييييييير زى السعودية ودبى والامارات

اوصف ليا ‏ترتيبات اجمل فرح ممكن تحضره

بصراحة اجمل فرح فى وجهة نظرى الفرح الاسلامى اللى يكون فيه البنات لوحدهم والرجالة لوحدهم وكله يعيش ويكون ازاى بقى الفرح ده العروسة تخرج من عند الكوافيره وهى لابسه فستان الفرح وعليه زى نقاب او بيشه عشان المكياج وشعرها كمان هيبقى باين وبعدين تركب العربية ويوصلوها المكان الفرح فى قاعة اسلاميه وتطلع بقى وتهيص والعريس بعد كده هيطلع يقعد معاها شوية فوق ويرقص معاها وبعدين ينزل تانى لزملائه

بتراعي ‏كلام الناس والقيل والقال؟ لو اه او لو لا قول لى ‏ليه؟

انا مبحبش الناس اللى بتقعد تتكلم كتير وتلت وتعجن وتأكل فى فروة غيرها وكمان انا مش بحب حد يتكلم عليا نص كلمة عشان كده بخلى بالى من تصرفاتى الحمدلله بس مش معنى كده انى بنافق لا اللى اعرفه ان البنت المفروض تبقى فى الشارع هادية يعنى لاصوت عالى ولا مشى كده ولا كده وده لو التزمت بيه البنت يبقى مين هيتكلم عليها ؟

صحيت من النوم ما لقيتش الموبايل ولا الكمبيوتر ولا ‏الكاميرا الديجيتال ولقيتنا ‏رجعنا لعصر الحمام الزاجل والحصنه هتكون سعيد؟

هفرح جداااااااااااا عشان انا بحب الحصنه والحمام وهبقى ابعتلكم حمامه ببوست جديد

السعاده ‏هى؟

انك تسعد غيرك بس مش على حساب نفسك ولكن اللى محتاج انه يفرح وانت اللى ممكن تسعده

والسعاده الجميلة اوى هى انك تحس برضى ربنا عنك وبرضى امك

عندك أمل ‏؟؟ أسبابك

الحمدلله لانى واثقة فى ربنا اوى وعارفة ان الايام دواره

لما تحب ‏تهرب من كل شئ بتروح فين؟

بروح اصلى فى حجرة بابا وماما

امتى ‏أول مره خدت فيها نفس طويل كده وقلت بينك وبين نفسك يااااه الظاهر انا فعلا ‏كبرت ؟

لما تميت 20 سنه

لما ‏بتعمل عمل خيرى بيكون ايه هو دافعك الاول؟

رضاء الله ..... وهو فى حد بيعمل خير دافعه غير كده؟

بتشرب ‏سجاير؟ لو الاجابه اه ايه شعورك لو شفت ست بتشرب سجاير؟ وليه ‏؟

لا طبعا الحمدلله .... انا بستحقرها هى وزوجها واى راجل اصلا مش بحترمه لما بلاقى فى ايده سيجارة مش الست بس و الست كده تبقى بجحة اوى ومش كويسة وتقدر تعمل اى حاجة طالما بدأت بكده

بتعرف ‏ايدك اليمين من الشمال ازاي؟

اللى بعمل بيها كل حاجة .... بس سؤال غريب

ايه اكتر ‏اله موسيقيه بتحبها ؟ ؟

البيانو

فى رأيك ليه الذوق والنخوه ‏اتعدموا؟

عشان بعدوا عن الدين لان الدين فيه كل حاجة

ايه ‏الحاجه اللى لو حصلتلك تبقى سعيد قوى؟؟؟

انى اتجوز واعد فى البيت واستريح من الشغل وزحمة المواصلات

تختار ‏يبقى عندك...ارض زراعيه ولا اجنس عربيات و لا كام عماره و لا فلوس فى ‏البنك؟؟؟؟

هى الارض خير طبعا بس انا ماليش فى الزراعة وهجيب عمال ان شاء الله

البحر و ‏لا النيل؟؟؟

الاتنين بخاف منهم بس البحر اكتر

مركب و ‏لا طياره؟؟

طياره

مجنون و لا ‏عاقل؟؟

عاقله

تقرأ ‏كتاب و لا تتفرج عليه فيلم؟

اتفرج عليه وبعدين اقرأه

وامرر التاج

اسكندرنى اوى

قلب ابيض